நிரம்பியிருக்கும் கோப்பை

 

புத்தியில் புகுத்தியிருக்கும்

புதிய சித்தாந்தங்கள்;

மனக்கிண்ணம் வழியவழிய

கணக்கற்ற எண்ணங்கள்;

புலன் வழியே உள்வாங்கும்

பொய்கள், மெய்கள்;

புறத்தோற்றத்தின்

பதிப்புகள் , பாதிப்புகள்.

திகட்டத்திகட்ட திரண்டிருக்கும்

தேவையான தகவல்

தேவையற்ற அகவல்;

ஊருக்கு உபதேசங்கள்.

உதவாக்கரை கொள்கைகள்.

நாவுக்கு ஓய்வின்றி

அளவளாவும் அலம்பல்.....

உள்ளத்து ஏட்டில்

ஊசிமுனை இடங்கூட

உபயோகத்திற்கில்லை.

எப்படி நுழையும்

சித்தத்தின் தத்துவம்?

தத்துவத்தை விதையிட

கடுகளவு நிலமும்

கிடப்பிலில்லை.

உயர்ஞானம் ஊடுறுவி

முளைப்பதெங்கே சாத்தியம்?

அகத்துக் குப்பைகளை

அகற்றிக் களையும் வரை

நீ சேமித்த பதிவுகள்

எழும் வீழும்

பதுங்கும் பம்மும்

அடங்காது சீறும்

மெய்ப்பொருளை மெய்யிலேற்று

சுயமென்றும் சத்தியமென்றும்

தன்னையே எதிரொலிக்கும்.

கருப்பையுடன் தொடர்ந்த கோப்பையை,

கவிழ்த்துக் களைந்து; கழுவி நிமிர்த்து.

மெய்ப்பொருளை மெய்யிலேற்றி,

அகப்பையில் நிறையும்

அருளமுதினைப் பருகு.

Inspired from : மூலம் : Zen கதைகள்

தமிழில்: ஷக்திப்ரபா