January 20, 2021

மற்றே நம் காமங்கள் மாற்றேலொரெம்பாவாய்

 



ஏறிவிட்டதாக இறுமாந்திருக்கும் போது
எங்கோ பிறழ்கிறேன்
சற்றே நெகிழ்கிறேன்
இறக்கைகள் முளைக்க - என்
இதயம் இழக்கிறேன்
.
கால்கள் தடுமாற
கைகள் நடுங்க
பிடி தளர்கிறேன்
கீழே கீழே கீழே
விழுந்து கொண்டே....
.
பரந்தாமா!
என் பிடி தளர்ந்தாலும்
நீ எனை இறுகப் பற்று.
புத்திகெட்டு மயக்கத்தில்
நான் உனைவிட்டு அகன்றாலும்
சட்டென தூர விலகாதே
சற்றும் எனை விலக்காதே

விரயம்




நீ பகிர்ந்த முகவரியை
உதறித் தள்ளினாலும்
உனது முக வரிகள்
அனுமதியின்றி
அத்துமீறி நுழைந்து
எனது அகமெங்கும்
தமை எழுதிக் கொண்டன
.

தொலைத்த
முகவரி வேண்டியே
எங்கும் அலைகிறேன்
நீ சுமந்த
முக வரிகளின்
தடயங்கள் தேடுகிறேன்
என் முக வரி
மண்ணில் புதைவதற்குள்...
குரல் கொடு!
-


January 19, 2021

என் காதலே! என் காதலே!

 




ஏ மேகமே!
நீ நீர் சுமப்பதைப் போல்
நான் கண்ணீர் சுமக்கிறேன். 
எனைத் தீண்டாதே!
.
ஏ மேகமே 
நீ பூச்சொரிந்தாலும் - என்
தேகத்தின் தாகம் தணியாது
.
சென்று வா மேகமே
எனை அழ விடாதே
சென்று வா மேகமே
உன் உறவு கசக்கிறது
.
நான்கு முறை கூறியும்
நகராத மேகம் நீ
மின்னலென கண்சிமிட்டி
இடியெனச் சிரித்தாய்
.
ஆதவனின் கருணை வேண்டி
மாதவனை தூதனுப்ப
"உனை சுட்டெரிக்கிறேன் பார்"
"உனை விழுங்கிவிடுகிறேன் வா"
என்றே வெற்றிக் கீற்றாக
பகலவன் உனை நெருங்கினான்..
நீயும் நொறுங்கினாய். 
*
சடுதியில்
மறைந்த உனை நினைத்து - ஆனந்த
மிகுதியில் திளைத்தேன்
*
வெட்கம்கெட்டவனே!
நீயோ என்அழகில் மயங்கி 
வானவில்லை பரிசளித்து 
நட்புக்கரம் நீட்டினாய்.
*
அறிவற்று நானும்
உன் மேன்மையில் மனங்குளிர்ந்து
நாளை மீண்டு(ம்) வருவதற்கு
சம்மதித்தேன்.
நம் காதல் இனி தொடரும்..

வேடதாரிகள்

 


எனக்கு நகை பிடிக்கும்
உன் நகை பிடிக்கும்
'பொன்னே' உன் நகை பிடிக்கும்
சிரித்தாய்..
.
எனக்கு நகைச்சுவை பிடிக்கும்
'பொன்னே' உன் நகையின் சுவை பிடிக்கும்
நீ அணிந்த நகையை சுவைத்தேன்
கிறங்கினாய்..
.
எனக்கு களவு பிடிக்கும்
'பொன்னே' உன்னை களவாடப் பிடிக்கும்
எனக்கு அழைப்பு விடுத்தாய்
உன்னையே களவு தருகிறேன் என்றாய்
விடியல் ஓலமாய் கேட்டது....
.
"ஐய்யோ பொன்னு.....உன் நகையெல்லாம்
களவு போச்சே...."

காக்கையின் பேரெழில்

 


ஒருவாய் சோற்றை
பெருவிருந்தெனவே போற்றி
சுற்றம் கூட்டி; பாட்டுப் பாடி,
ஊரறிய உரக்கக் கூவி,,
வானிலாடி வாழ்த்துபாடும்,,
கருங்காகத்தைப் போன்ற கருணை 
எவரும் கொண்டதுண்டோ சொல்!
அதன் பேரெழிலைப் போல
எங்கும் கண்டதுண்டோ சொல்! 

துவளாதே



மலரே முள்ளாகி மடியாதே
மனம் வெறுத்து
மரணத்தைத் தழுவாதே
மனப்பொருத்தமில்லா 
(திரு)மணப்பொருத்தம் என
துவண்டே தோல்வியைத் தழுவாதே
.
விண்ணை எட்டிப் பிடி - பிறர்
வியப்புற சாதனை புரி - நீயும் 
உன்னை வெற்றி கண்டே - உன் 
வாழ்வின் அர்த்தம் படி.
பொறுமையே ஆடையென்றறி- என்றும்
பெருமை நின்றிடும் சிரி. 

ஐஸ்க்ரீம்



தேனாக உருகி
தொண்டைக்குள்  இறங்கி
தகிக்கும் வெயிலை
தணிக்கும் பாவையே
.
பதமாகப் பாலோடு
சர்க்கரையுந்தான் சேர்த்து
பனியாக்கிக் குழைத்து
கனிகளுடன் சுவைத்திடவே
.
பனித்தேகம் தனைத்தொட்டு
பக்குவமாய் உண்டபின்னே - உன்
வெளிர் முகமே எனது இரு
விழி தன்னில் ஆடுதடி..
.
பகலென்ன இரவென்ன
பாவை நீ இருந்திட்டால்
இடமென்ன பொருளென்ன
தாவி உனை முத்தமிட
.
உயிரோடு உயிராகி
உணர்விலே பூ பூத்து
பல நூறு ஆண்டுகளே
புவி தன்னில் போயிடினும்
.
பிற ஒன்றை நினையாமல்
பத்தினியாய் காத்திருப்பேன் - நின்
பட்டுமேனி தொட்டிடவே
தவமானத் தவமிருப்பேன்