நமக்கு நாமே

நான் மட்டுமே

என் நினைவுகளை

காற்றில் கரைக்கிறேன்,

நான் மட்டுமே 

என் உணர்வுகளை

உதாசீனப்படுத்தி

கடாசி எறிகிறேன்.

தனியாக நான் மட்டுமே.

இனிமேலும் கூட

ShakthiPrabha

காணாமல் போனவன்

நகைக்கடைகளில் தினமும் திருதியை

கடற்கரைகளில் அடிக்கடி போராட்டம்

கோவில்களில் நித்திய ஆராதனை

மசூதிகளில் மாறாத பிரார்த்தனை

தேவாலையங்களில் அறிவு போதனை

பல்சுவை விருந்தகங்களில் வழியும் கூட்டம்

பலப்பல கேளிக்கைப் பந்தல்கள்...

கூட்டத்துப் பேரொலிகளால் கைவிடப்பட்ட

யாசகனொருவன் தூரத்தில்

காலிப் பாத்திரத்தில்

கண்மூடி மெட்டிசைத்துக் கொண்டேயிருந்தான்....

முத்துக்கள் அரிதானவை

அறிவுப்பசியின் ஆராய்ச்சி 

அரட்டைகளின் அலசல்கள்
அனைத்திலும் வளவளவென
ஆர்பரிக்கும் சத்தம்.
ஆழ்கடலின் அமைதியில்
அமிழ்ந்திருக்கும் அறிவைத் தேடி
அரிதாய் சிலரே
மூழ்கி முத்தெடுக்கப் போவதால்;
மேலெழும்பி நிற்பதெல்லாம்
சலசலவென
கரையெங்கும் உமிழப்படும்
அலைகளின் பேரிறைச்சல்.

குறுகிப் போனவை

நின்று நிதானிக்க பொழுதில்லை..
கவிதைகள் ஹைக்கூகளாக
குறுநகை பதித்து விரைந்தோடுகிறது.

குறுங்கதைகள்: குறும்படங்கள்: குறுநாடகங்கள்:
காலம் போன்சாய் வடிவில்
வலைக்குள் குறுகிக் கொண்டது .

நேசிக்க நேரமில்லை...
அன்பை அரைநொடிக் குறுஞ்செய்தியாக்கிய
பிழையால் பிறழும் குறுங்காதல் .

ஒரு வரியில் அறம் போதித்த ஆத்திச்சூடியும்
ஒன்றரை அடியில் உலகை அளந்த குறளும்
தீர்க்கதரிசனத்தில் விளைந்த குறுமுத்துக்கள்

சின்ன சின்னதாய்

சந்தோஷப் பொழுதெல்லாம்
சாதனைக் கணங்கள்.
அன்றாடப் பணியிலும்
மறைந்திருக்கும் பெருவெற்றி.
மலர் கொண்ட நறுமணம்,
தினம் சிந்தும் புன்னகை,
மனம் பூக்கும் நற்சிந்தனையென
விரியும் வண்ணக் கொண்டாட்டம்.
வாய்மொழியும் வாழ்த்துக்களே
முடிசூடா மகுடங்கள்.
பிறக்கும் ஒவ்வொரு நொடியும் புதுசு.
இயற்கையின் அரிய பரிசு.

#குறும்பதிவுகள் (2)

சார்புடைமை

இடப்பக்கம் வலப்பக்கம்
மேலும் கீழுமாய்
எண்ணங்கள் சிதறியிருந்தன.
எல்லோரும் எல்லாவற்றையும்
எடுத்துக் கோர்த்தனர்;
எடுத்தாண்ட வார்த்தையிலெல்லாம்
இன்னொருவரின் வாசம்
இருந்துகொண்டே இருந்தது

#குறும்பதிவுகள்  (1)